Nun hai mas que la fiesta la musica !

Onten fui la fiesta la musica eiqui an Paris. Cume t’hei de dezir… ye a mode d’un San Juan so que ye an França i acuntece an cada recanto dua ruga ! Durante tod’al die ya tamien la nuite las pessonas, ya quien quier pon-se a cantar, a beilar ou a tucar d’un strumiento; quier dezir cada un se pon ende a fazer musica a la sue maneira.

Tode los cunciertos son de bolra, hai grupos purfissionales outros ya menos i pur fin uns que solo tocan naquesse die, esses son los que mas graça metan.

La giente an frente al bar "le vrai Paris"

Bon, you pra l’anho ya pensei talmien an me poner ende an baixo la casa a tocar dalgo cula fraita, mas purmeiro tengo de la marcar a Celio de Custantin ya açpuis tengo de daprender a tocar. Buono, an un anho acho que puodo chegar a cabo disso todo.

Mas pur anquanto inda ye melhor de scuitar i ber cume los outros tocan i beilan, que you nun sei. Ostia ! Mas outra cousa pra daprender ! Ha, ye berdade, nun sei todo. Dalguas bezes squeço-me.
Pulas rugas habie muita giente, you i mas uns. Habie ua spanhola que quedou toda cuntenta al dar-se decuonta que falaba “Bable”. Inda’l spliquei que ye’l “Bable” dal lhado squierdo, que’l chaman lhionés, i mirandés an Purtual. Açpuis ya solo crie que you’l falasse assi, inda bien.

Un grupo bien buono

Montmartre fui adonde fuomos, ye sabes, adonde hai aqueilha eigreija d’adonde se bei tode Paris. Ban alha los namorados, you bou alha culas mies antenas, ye alto cume’l c...

Los bares eilhi staban chenicos, rapazas de-leis an cada recanto, anté las habie a beilar an barandas. Dende lumbrou-se-me un grupo de musica danse que se chamaba Paradisio i dezie assi : Esta noche quiero bailar contigo... No staba aquilho jeitoso ! Hai un grupo que tucou bien i que you gustei bastante, lhebaba pulas ondias la musica cun strumientos tod’al qu’hai de mas tradicional : acordion, baterie, guitara, i guitara eiletrica. I las catiyas ya bien angraçadas dal tipo “Non Gertrude, mais Fernande quant elle parle, je bande” i mas assi.

Un grupo de rock

Nun ye ralo de ber grupos de rock, mas angraçado inda ye quando las musicas se mesclan, ende ye que ya nun s’antende puto cuorno, fui’l que passou al you houbir musica brasileira culos gritos eistéricos dua tie berando le gusto que tenie pur cantar.

Un grupo brasileiro, un grupo de rock

Mas sabeis onte yera Deimingo, ya hoije die de çacho i anton naide se quedou mui tarde purque habie qu’ir a la tarimba. You, meia nuite i meia ya staba eiqui an casa. I si, sta cierto al die fui purreiro. Mesmo a pesar dal friu, si purque eiqui inda nun ye branu, ostia, apenas fai 20 pul die y las nuites quaisque parece Cicuiro nals fins d’Agosto, bah, bah que “barbaridade” !

Pa l’anho amostro al que you sei fazer, letra, cançon, strumiento i ruga ! Na nuossa lhiengua claro purque queda bien !

Nun hai mas trabalho ? Ho !

Hoije alhebantei-me, temperano, cua musica na cabeça de los U2. Ya tode cuntentico de marchar pal trabalho, nien tomei al zeiuno. Na berdade staba cuntento purque querie spurmentar nuobas eideias que m'aparecieren na cachimonia esta nuite.

Eideias que se m'acunchegorun cun certeza pur causa d'haber falado cun muitos angenheiros ya ambestigadores hai uns dies atras an Grenoble, nals JNM 2009. Ye ua cunferencia suobre micro-ondias (nada a ber culs fornos) i micro-eiletronica.

I anton cume siempre salie de casa, i beixei anté abaixo, pur baixo tierra pra pegar al tren. Nun me squecie de pagar los 92 ouros mensales, cume hoije ye'l die primeiro, se no nun pudie antrar nal tren ! I ye 45 minutos i 40 km açpuis que chego a l'ouneversidade. So quando beio cadenas an buolta la puorta... Cralho quies ber qu'esses ximpanzés nun trabalhan hoije ! , pensei you.

You i un "fantasma" nun quarto anecoido que sierbe pra fazer testes d'antenas

Ye qu'hoije ye die special, trabalha s'un quier ! I cume you quiero, purque nun tengo outra cousa pra xudir, pus alha fui ! Fui anton que pensei ir a ber los bigias i falar cun eilhes pra que me deixassen antrar :

-Al senhor ten outorizaçon ?

-You ? Mas pra quei, you trabalho eiqui. Sou dal lhaboratorio ESYCOM.

-Home ! Pecisas outorizaçon dal persidiente de l'ouneversidade, se no nun entras !

-Pus mira la mie carta de studante, i bei alha que sou studante-ambestigador dal lhaboratorio...

-No, mas isso nun ten niua assinatura dal persidiente ! Nun bal !

-Cralho ! Mas cume bai isso a lhebar assinatura dal tiu esse ?

-Pus nun lhieba, nun entras !

-Mas quiero ir a trabalhar !

-Mira de tode las maneiras tod'al lhaboratorio sta de baixo alarme i nun puodes antrar !

-Quei ? Cun alarme ? Mas pra que ostia serbies bos ? Ide pra casa que nun fazeis nada eiqui !

I l'home, einerbado, fechou-me la puorta a las trompas... i you, alha passei outra beç pa l'outra lhado la ruga, entrei nal tren i fiz al camino an sentido cuntrairo. Salie de baixo tierra i chubie anté casa... que dies andan purqui, açpuis inda ben l'outro pirilhampo a dezir que los ambestigadores nun fazen ua gitoria !