24.5.10

Nun hai mas bergonha ??? (Ostia)

Hoije fui l'ultimo die dal "Capital Nature" eiqui an Paris. Fui mui buono ! Passou-se todo nals Champs-Elysées donde se custruiu nua sola nuite un jardin cumpreto cun pinhos, oulibeiras, flores, girasoles, seladas, porros, antremoços, i que sei mas... un tagalho de bacas i outro de cabras !


Giente a roubar... tumilho, si... tumilho !!!



I nun solo qu'açpuis tamien habie ua chabolicas donde se pudie mercar muitos purdutos regionales : bino, pan (mui buono a solo 1.5 ouro'l kilo, mui ralo eiqui cu aquesse precio), cerbeija (tamien mui buona), queijo i muita fiêsta que todo se quedou mui animadico.

Mas al pior acunteciu uns poucos minutos antes de l'ançarramiento l'eibento. Houbo un que pensou que pudie arrenca ua frole pa la lheba a casa. Dende toda la giente ampeçou a arrenca todico !!! Yera uns a agarra la selada, outros a arranca los porros i a anchi sacos plasticos cume se stubissan nun mercado !!! Uns anté lhebaban las canhas l'açucre pra casa.

Los bigias lhougo tentorun fazé dalgu pr'aparrar aquisso todo, mas cume la giente yera tanta qu'eilhes nun cunseguien nada. Anton bieno-se la pulicia i ampeçorun a tanta fazé dalgu, mas ya todos staban cun caco de tumilho ou un arbro de l'ananas !!! I outros ya benien culs bricios dal garatos chenos de selada, porros i bobidas !!!
Un jurnalista sacando un retrato de la stupidade houmana...

Un agricultor qu'habie trabalhado pra custrui'l jardin, zgustado de ber aquielho puso-se a gritar "les parisiens sont des voleurs !". Los de Paris son uns lhadrones, que dezie él. "Benie mos de tan loinge, eiqui, pra bos amustra'l nuosso trabalho i bos cheguais i roubais-me las mies froles, las mies seladas, las canhas l'açucre !!! Sodes uns lhadrones, uns lhadrones !".

Cuitado'l rapaç anté churaba que nunca pensarie qu'ua cousa daquestas puderie acuntecer ! You acho qu'isso debe de ser de la crize, lhougo la giente s'apurbeitou dua selada... i anté los houbo qu'arrencorun las batateiras, mas claro nun habie batatas...

23.5.10

Nun hai mas que fazé dals Champs-Elysées un jardin !

Hoije a la nuite tenie ganas d’ir a la ruga pra vé la giênte, las outras pessonas a anda pur ende. Fazie buôno, ũa de las purmeiras nuites assi eiqui.


Las purmeiras pieças dal jardin !


Qual fui’l miu spanto quando m’acuncheguei als Champs-Elysées que nun habie un solo carro... mas habie muitissimos tratores i camiones ?


Los camiones a la spera pra çcargar


Hui tantos, purrie mas de cinquenta ! I eilhes pulhie fazen ua fiesta que solo eilhes tenen al segredo, ye culs apitos i todo. Ye que nien todo los dies hai mas de cinquenta camiones nals “Champs”, quaisque parece ua manefiestaçon !


Un camion chenico de lhino !


Eilhes andan a fazé un jardin... si, si un jardin home ! Ancrible, no ? Aende nun tal sitio ! You ya stou aspéra pra vé lhougo pu’la manhana cume aquisso mos vai a salir !
Mas que fixe ! Andei a dar un bistaço puls camiones i anté trairen lhino i fabas tamien ! Ala, vou-m’a drumir.
Dende Paris, un abraço.