11.6.10

Nun hai más que tender pontes...

Esti blogue ñació va tiempu col enfotu d'unir (culturalmente) un poco más a la comunidá mirandesa y asturiana (y la llionesa tien les puertes abiertes, y si hay daquién d'ellí que quiera collaborar, que sepia que tien les puertes abiertes) alrodiu d'una llingua y de proyeutos comunes...

Sicasí, danos un poco murnia ver qu'arriendes d'esti blogue, nun cuayó muncho la idea de facer daqué más pola comunidá "en sentíu llargu"... ¿Falta d'idees? ¿Galbana? ¿Falta d'enfotu? NUn lo sabemos, por si acasu, ehí van delles idees... masque seya predicar nel desiertu.

A nivel institucional:
1- Enxertar dalguna actividá venceyada a Miranda na Selmana de les Lletres... ¿Por qué non dalgún académicu nuevu, mesmo que se fixo con Lleón?
2- Alcuentros d'escolinos d'Asturies y Miranda (paezme que se fixeron yá dalguna vez, pero más...)
3- Distribuyir llibros, periódicos (Les Noticies), etc, n'asturianu en Miranda... (y al revés)

A nivel de sociedá civil. Delles idees:
1- Un Sidra&Blogues pan-asturllionés
2- Un diariu dixital pa tol dominiu... (Yá sé que n'Asturies tenemos munchos, pero bien fácil diba ser da-yos entrada a los mirandeses nún d'esos proyeutos)
3- Una asociación de defensa de la llingua (o una federación d'asociaciones) d'Asturies, Llión y Miranda que fixere campañes conxuntes (especialmente na estaya europea)
4- Un programa de radio con participación de xente mirandés en Radio Sele... (Y anque seya un poco utópico, intentar facer una radio n'asturianu pa tol dominiu llingüísticu)
5- Una revista de lliteratura (toi pensando en Formientu, por exemplu) que seya decididamente pan-asturllionesa, que se fomente l'alcuentru de xente de dambes partes...

Nun dexen de ser delles idees... Dende Nun hai más vamos tar encantaos de sofitar cualaquier iniciativa que-y dea valor a la nuesa llingua común, l'asturianu (tamién llamáu llionés, mirandés o asturllionés, pero que nun dexa de ser la mesma llingua)

3.6.10

Nun hai más qu'adoptar el cuadru européu de referencia... (A1, A2, B1, B2, C1, C2...)


Va poco diose anuncia de que l'ALLA en collaboración cola Universidá d'Uviéu va facer la UBRA "Universidá Asturiana de Branu". Nesta institución braniega, que nun se fai na playa nin se degusten xelaos (los clixés del branu... hehe...) va afondase nel conocimientu de la llingua asturiana y ufiértase pa ello, si nun lo entendí mal, un cursu d'asturianu básicu y otru d'afondamientu...

La verdá, ye qu'hai munches coses nes que nun tamos homologaos a europa (y mesmo a otros ciudadanos españoles con llingua propia estremada del castellán), y ye por mor de los nuesos políticos y decisores... No que cinca a la RTPA, no que cinca a la oficialidá de la llingua, no rellacionao col enseñu... Ehí puédese facer presión, y les instituciones asturianes comprometíes pa col idioma faenlo (como l'ALLA vien faciendo a mio paecer perbién dende cuantayá...). Sicasí, nesta estaya, y correxíime si m'enquivoco, porque nun soi espertu ya inoro la tema... L'ALLA nun establez un cuadru de referencia del asturianu en base a un nivel européu... (igual ye'l gobiernu el que lu tien qu'establecer, por eso digo correxíime si m'enquivoco), pero qué-y costaba a l'ALLA nomar a los sos cursos, por exemplu "Asturianu básicu, A2" y al d'asturianu avanzáu "Asturianu avanzáu C1"...

Cuido que mos daría más seriedá como país, y que-y daría al idioma una homologación internacional que precisa. Pos l'asturianu ta necesitáu d'entrar nos foros mundiales de les llingües: Atles de la UNESCO, reconocencia internacional, etcétera... Yo nun sé si nun se-yos pasó pela cabeza, o si nun ye la competencia d'ellos... Pero cuido que taría bien facer 6 modelos d'esámenes pa concordar colos 6 niveles ... Nin siquier fadría falta facer los 6 niveles, de fechu podría facese A2, B2, C2, por exemplu... o cualaquier otra combinación... Ehí lo dexo...