Nun hai mas que d’ir a bé la Deolinda !

Yera n’ua sesta, hai purie uas cinco sumanicas, dixo-me al miu pursor : “Mira tenes de m’ajudar a mudar-me... A ber se me benes a da ua mano home, ta bien ?” You arrespondie-l que si i anton fumes alha a sue casa ya pur la strelhumbre. Habie él alugado un camion, apénas yera carga-lo i ala. Home, fui sofa, cadeiras, cama, mesas, ya dous frigorificos i ua maquina de lhaba roupa, sien squecer l’almairo que yera inda mas bielho que los Afunsico ya mas pesado qu’un burro muorto !

Ana, Luis, Pedro i Zé a l'Alhembra an Paris

Ala, pus tudico pulas scaleiras a baixo que fui... Inda bien que tamien staba outro pursor cun nos. Puls trés lhougo fui todo pal camion. Acabadico, camion chenico, que mos diç al miu porsor : “Agora ua cerbejica cada un, no ?” You miro palas horas, i digo :”No !”... “Cume no ?”... “Pus no, que me bou a bé a la Deolinda !” “I agora aquessa quien ye ? La tue gaija ?”... “Ha ! No! Que se fusse ya nien habie you benido eiqui !” Dende çpedie-me y puje-m’a currer... Yeran las 20h, staba an Saint-Mandé y tenie d’ir anté République, alha donde tucaba Deolinda.

Mas i bos sabeis quien ye Deolinda ?

Pus Deolinda ye’l nome d’un grupo de fado, buono dalguns dizen que nu ye fado. Son quatro, dous a la guitara (Luis i Pedro), un a la cuntrabaixa (Zé), i cralo, la cantadora que ye Ana. No, home, nun ye Deolinda que canta ! Pus Deolinda ye tamien’l nome de la personaige qu’Ana fai durante to’l spetaclo. Cunta la sue bida pula capital de Purtual, fala dals sous amores i ye todo bien purreirico.

Ye ampressionante cume Ana nun para ! Remexe an to’los lhados, sferruncha puls aires i beila al fado. Dende a dezir que’l grupo ye’l facanito dal fado ye muito acho you. Mas la berdade ye qu’Ana bai mesmo bien colorida, las guitaras nun son purtuésas, la cuntrabaixa da un son que ten un cheirico a Jazz. I anton quei ? Nun ye fado ? La boç d’Ana parece la resureiçon de la Malia Rodrigues i ye tan de-lei, ten tanta proua, que nun se puode dezir que nun sera fado, la Deolinda... cralo que ye !

Mas i’l fado ye musica triste... Deolinda nun ye triste. Buono, you direi que Deolinda si sta triste, a la bezes, i dende se bei. Mas lhougo assi que se scuita la musica, un sta cume... parece que se pon un a querer scapa-se de bacanças, d’ir pr’aculhouca, ye ua musica biba ya fresca !
Mas y anton... al fado nun ye assi me direis bos ! Al fado, nurmalmiente da ganas de churar i ende no !

Ye que, caros leitores, se bos anteirais bien de l’assunto, al fado zambuolbiu-se fai tiempo quando habie anterditos puliticos ya religiosos y dende ben la tristeza la musica, al morrenhento de la cantadora ou cantador, i pasmaçon cuntina cume se fusse ende un pulitico a palrar ou un cura a dezi la missa.

Hoije, a mai ! Ya nun hai nada daquesto ! Demudou muito’l mundo; la giente biste-se cun quelores, la giente beila, la giente sta cuntenta. I’l fado de Deolinda sta simplesmiente cume la giente, tal i qual cume quando’l fado naciu.

Anton, si, pudeis tené la certeza... DEOLINDA SI QUE YE FADO !

Ua cousa que you nun bos cuntei... Quando s’acabou al cuncierto, bie you uns jurnalistas. Ye anton que me fui atras deilhes :

-Ides a ber Deolinda ? You tamien los quiero ber...
-Sos purtués ?
-Antre outras cousas, si.
-Mas i tu quien sos ?
-Thierry.
-Thierry ? Nun me parece ser mui purtués.
-Thierry Alves...
-Buono, nun sei se puode benir... ye que nien sos jurnalista, nien nada...

Mas ye qu’açpuis tantu ansistie que me deixorun ir cun eilhes... i anton si que bie de berdade berdadeira a Ana, .... Tube’l praser de ber l’anterbista, i daprendie qu’un nuobo disco sta an purparaçon !

Mas la melhor parte fui açpuis l’anterbista. Lhougo fui a bé la Ana i dixe-l you que yera de Miranda i que’l querie ansinar dalgo an mirandés... I anton ye assi qu’agora Deolinda tamien ya sabe dezir “obrigado” na nuossa lhiengua...”Que Dius bos-lo pague... ai mas que grande obrigado” me dixo Ana. Açpuis ye que fui, que me dou un abracicu i you quedei-me todo cuntentico de la bida !

Si, si, que Dius te-lo pague Deolinda que you passei ua mui buona nuite !