Nun hai más que reñacer

Nun hai más que reñacer. Ñacer otra vuelta nun ye lo mesmo que ñacer la primera. Ye daqué muncho más fondo, muncho más trescendental... Ye refacer el camín andáu sabiendo per ónde nun hai que triar, ye tornar a casa y entamar otra vuelta a facer les coses sabiendo cómo nun hai que les facer, sabiendo cuála ye la mala manera y sabiendo qu'aínda queden toles otres pa prebar y tastiar y deseyar tener suerte la próxima vegada...

Poques reñacencies mos da la vida. Nun son munchos los que tienen la oportunidá de reñacer y aínda menos los que la aprovechen. La primavera ye un símbolu d'ello... Y qué diferente vese la vida cuando ún reñaz, cambiando de referentes, d'actitúes, de suaños, de prioridaes... Cuido que debiera ser l'oxetivu de toles persones, facer de la so vida, de la so esistencia la infancia eterna, l'esfrute de les coses cola mesma pasión que-yos punximos de la que yéremos guah.es... Séique al poco de reñacer, delles selmanes, díes, meses o, con suerte, años depués, vamos tornar a acomodanos, a perder l'encantu de les coses, a nun apreciar tolo que mos arrodia nin los regalos que mos da la vida... Cuido que ye murnio, y que diba ser abondo guapo de vivir la vida como nuna infancia perpetua, onde cada momentu, cada situación, cada persona, cada conversa yera esfrutada al máximu, onde l'apasionamientu enllenábalo too, onde un viaxe en coche colos padres escuchando Los Berrones nuna cassette yera siempres una aventura, onde'l partíu de fútbol del recréu dábanos pa falar media vida y prestábanos pola vida entafarrar colos plastidécor fueyes y fueyes... Qué foi d'esi tiempu? Por qué lu escaecimos? Por qué enllenamos les muries de lletres grises, por qué mos fundimos na crítica, nel mal cuerpu, na escuridá...? Daqué perdimos, daqué escaecimos, cayósenos dalgo pel camín... Y vive dios qué dificil ye atopalo! Y al empar... qué importante.

Quiciabes, el mundu nun seya meyor de la que seyamos quién a ver cada primavera como un renacimientu y non como daqué que "yá tocaba", pero igual nós sí sedríemos meyores. Y digo igual, porque ye un suponer, namái un suponer d'una persona que fai lo imposible por reñacer cada día de les cenices apagaes, del fueu qu'una mano estraña matare... que fai lo imposible por alendar nel aire llimpio de la tarde, por mirar la lluna y les estrelles suañando que la felicidá nun ta ayuri, sinón muncho más cerca que lloñe...

...y qué difícil ye...