Nun hai mas qu'amanhar las cangalhas !

Soutro die, pula nuite, quando m’iba pala cama, al tira las cangalhas, saltou-se-me un bidro i quedei-me cu eillas sfarrapadas; un cacho an cada mano.

Fierro de suldar a la mano i las cangalhas sfarrapadas !

Anton, nal die açpuis, fui-me a la casa de la cangalhas, ende onde you las merquei. Apareciu-me ua tie que me splicou que nun se puodien cumpuner… que foda !, pensei you. I cuntina la tie aqueilha splicandu-me que tenie you d’ir al médico dals uolhes pra que me receita-se dalgo nuobo. Uns bidros nuobos, cangalhas nuobas. Mas i anton, dixe-l you, pra quei ? Se bos aende teneis to’ls dados de las cangalhas, i tengo you d’ir al médico pra que me receite la mesma cousa, no ?... Si ! Que m’arresponde eilha.

A lixar un dals arames de las cangalhas

Arreconho, dixe-you aca pra mi, que peis este ! Ya que nun tengo puto-perro pr’aquessas cousas. Pus buono, agradecie la tie, qu’an fin, nun m’habie feito nien meia jeitoria, i dende fui-me pal lhaboratorio. Cheguei a la sala de fabricaçon i medida que ye la nuossa oufecina, i pensei you : Sou angenheiro, la ostia, i bou a cumpuner las mies cangalhas !

Nun tenie nada pra perder, nun las puodie stragar mas que staban. I ala, la purmeira cousa que tenie you de saber yera se talbeç serien feitas de cobre, las cangalhas essas. Nada mas, puje-me a lixa-las c’ua lixa... Mas cuidado, so lixei la parte an buolta donde se partinun. I pur suorte, lhougo bie que yeran de cobre ! Haaahhaa stou salbo, pensei you.

Las cangalhas ya cumponidas !

Anton puje-me you cul fierro de solda a puné stanho an buolta de los dous cachos, i cume pudeis pensar nun fui façel... purque... si purque nun bie you a quatru nun burro. Y açpuis suldar curretamiente aquessas dues partes cume debie de ser... Mas alha fui i bien centradico que me quedou todico... ya agora, pul menes, anté que se me sfarrapan outra bezica.
La cuncluson daquisso todo ye qu’apesar de you ser angenheiro d’antenas, tamien lo sou de las cangalhas ! Un mecanico feito !