5.2.10

Nun hai qu'aceutar más el conceutu de propiedá privada

Hai coses qu'un aceuta porque siempres les vio. Dende que yo yera pequeñu vi como dalgo normal que la xente vaiga a los bancos, que los bancos-yos empresten perres y qu'ellos les devuelvan al tiempu con un interés...

Esto ye daqué que vemos normal porque dende que ñacimos les coses foron asina y ún acaba viendo como "normal" dalgo que ye únicamente "habitual". Si ún analiza'l papel de la banca, dase cuenta de que la banca gana unes perres por dexar dineru, y que cuantes más perres tengas, más podrás dexar, más interés cobrarás y más ricu sedrás, poro, cuanto más ricu, más fácil ye selo más... Delles persones, cuando defenden a los empresarios del clásicu discursu comunista de la plusvalía dicen que "los empresarios arriesguen, sacrifiquen, dedíquen-y tiempu a la empresa, innoven, creen"... Nun digo yo que nun seya verdá - tampoco qu'aceute como ciertos estos argumentos pa xustificar la llibre empresa, esto nun toca nesti post- digo que nel casu de la banca nun hai riesgu nengús: avalar cola fortuna d'otru, cola casa, con cualaquier cosa... garantíza-y al bancu que faigas lo que faigas, él va recuperar les sos perres... Da igual por qué-y pidieres les perres al bancu, si por dir de vacaciones a Punta Cana o por montar una empresa curiosa, si nun-y yes a pagar, va venir a embargate les coses... y si-y lo quieres impedir, l'estáu va venir pa dicir, "ye verdá, vusté tien un contratu col bancu X, tien que-y pagar" - "ye que nun tengo les perres" - "entós va pagar cola so casa". Y ye'l propiu estáu el qu'unvía policíes a sacate de la to única casa, a dexate na cai y a facer efeutiva la llei... Ye l'estáu'l que-y quita la propiedá al probe pa da-yla al ricu....

Actuando asina, l'estáu fai del conceutu de "propiedá" la máxima de la so aición. Da igual la cantidá, los motivos, la situación del deudor (qu'igual ye un pufista por viciu que lo ye por involuntariedá): L'estáu ampara a la banca nel so embargu, ampárala faciendo que la profesión d'usureru seya aínda más llucrativa, nun habiendo riesgu dengún...

Y nós vémoslo normal, que ye lo peor. Vemos normal qu'a un home que nun pagó una delda se-y quite la casa, ensin importar cuántes cases tien él y cuántes tien el prestamista, ensin importar los sos medios nin los del prestamista. Lo único que cuenta, lo único que val, ye'l conceutu de propiedá privada, ye por esi conceutu que l'estáu fai lo que seya, qu'ampara coses que sedrán llegales, pero que nin son llexítimes, nin muncho menos son morales.

Vivimos nuna sociedá donde tolos drechos son rellativos. El de la llibre espresión por exemplu, ún nun pue ponese a facer apoloxía del terrorismu, nin a dicir mentires de los demás col enfotu d'inxurialos... acéutase una llimitación necesaria. Lo mesmo pasa col de la llibertá, naide nun pue ser puestu ente rexes, nuna cárcele, pero en dellos casos esceicionales - robos, asesinatos - acéutase... La vida ye igual nes nuestres sociedaes el otru gran derechu que ta cerca yá de ser absolutu, pero tovía ye llícito nuna guerra, nun tirotéu, en defensa propia matar a daquién.

Per contra, el drechu a la propiedá privada nun aceuta más llimitación que los impuestos y el "interés xeneral". L'interés xeneral suel invocase pa carreteres, ferrocarriles, aeropuertos y obra pública del estáu, qu'indemniza darréu... Pero nun se considera "interés xeneral", qu'una persona nun pierda la única casa que tien, qu'una persona con un llar nel que vivir lu pierda y se convierta nun vagabundu de la nueche a la mañana... ehí nun s'aceuta l'interés xeneral. L'interés xeneral ye protexer la banca, la propiedá privada "über alles". Y equí nun entren xustificaciones lliberales d'empresarios "qu'arriesguen, qu'innoven, que creen, que trabayen más qu'un empleáu", ye la usura que nun conoz llímites y qu'un estáu que diz buscar el bien xeneral ampara y defende.

Yo nun sé cómo siguimos viendo estes coses como "normales", nun sé cómo nun mos fierve'l sangre cuando sabemos que día a día los bancos s'aprovechen d'embargos pa facese tovía más ricos y dellos cientos de persones queden na cai o na ruina por esti conceutu de propiedá privada... Cola crisis empreses quebraron munches -multinacionales nenguna- y bancos? En toa España namái que quebró la Caxa de Castiella La Mancha... y yá, apara de contar.

No hay comentarios: