Nun hai quien me l'arranca!

Soutro die quando passou la chama, si la chama aqueilha que diç qu'hai que la lhebar pul mund'anteiro. La chama essa quando passou por Paris fizo mos ende un spalhafato que baia !

L'arranca de bandeiras... l nuobo jogo oufecial...

Eran pulicias a los muntones, i Xineses mui stranhos. Parecien tunticos, eilhes tanto l'apagaban i açpuis turnaban a açendela... que cousa !

I açpuis houbo los de las bandeiras, anton cun esses ye que fui ! Lhougo los pulicias fueren alha pa las arrencar a las pessonas que lhebaban aquessas bandeiras dal Tibeto. Aquielho éra por demas, so bisto !

Anton you pus m'a pensar n'isso. I tanto que pensei que me dei decuonta que you tenie ua bandeira que naide me puodie m'arrancar. Ye ua bandeira algo special, znhada hai ya algun tiempo. Hai muitos que dizen qu'eilha ye ua bergonha, que dizen que parece la bandeira de Spanha, que las quelores nun son buonas, i tal i qual.

Essa bandeira nun eijiste berdadeiramiente, solo, por anquanto, ye l resultado d'un munton d'uns i de zeros nun fixeiro anfurmatico.

Mas fui feita cul curaçon assi que se me la quieran tirar teneran que me tirar l curaçon. De tal maneira qu'essa nun hai quien me l'arranque, a nun ser ua rapaza, talbeç...